會員登入 | ‧教育電子報 ‧工作紙下載

2015.01.16
1329 1329


      幾位同學在做功課,幾經辛苦之後,終於完成,同學一伸懶腰:「搞掂!」何謂「掂」?本期文章就講講關於「掂」的故事。

     「掂」在廣府話中有豎直之意,與「橫」相對。由此出現「橫掂」一詞。比如話,我們會講「橫掂都係要做功課,不如認真啲,摞個A返來。」也會講「橫掂出街,不如食埋飯先返屋企啦!」這裏的「橫掂」,就是書面語「反正」的意思。

      有一個關於「橫掂」的笑話。大約在兩千多年前的春秋時期,一個魯國人扛着一枝很長的竹竿進城叫賣。雖然城門又高又大,但這位仁兄打橫拿竹竿,城門不夠寬,打掂拿竹竿,城門不夠高。就在他滿頭大汗,不知所措之際,一位老人家提點:「城門太小,你鋸斷竹杆不就可以入城了嗎?」魯國人照辦,結果一整天都無法賣出去。原因很簡單,原本很長的竹竿,無端端鋸短了,就沒有人有興趣買了。

熟悉粵語的人不難發現,「掂」通常與成功、順利有關。
例一:今日功課唔多,半個鐘搞掂。
將一件事辦妥、弄好,我們講「搞掂」。一些講普通話的朋友不明白「搞掂」的緣由,取其音讀作「搞定」,雖然大家都明白其意思,但其意味卻相去甚遠。

例二:你真係冇用,咁簡單都搞唔掂。
事情沒能辦妥,可以說「搞唔掂」。如果不但事情沒辦妥,還使事情變得更糟糕,可以說「搞橫(陰平)」。正如上文所講,「橫」與「掂」相對,「橫」經常與不順利、不講道理聯繫在一起。所以,廣府話中還有「打橫來講」同「捩橫折曲」。

例三:今日辦事處處有貴人,真係「掂過碌蔗」。
「掂過碌蔗」,比蔗還要直,當然是非常順利。但為甚麽不是「掂過水喉通」、「掂過碌木」或者「掂過碌竹」呢?因為蔗不但直,還很甜。講「掂過碌蔗」,還可以借用甜的意思。正所謂「外形掂過碌蔗,味道甜過碌蔗」。

各位同學,你今日過得「掂唔掂」呢?

考考你
請說出「掂」在粵語中的意思。

 

 

答案
豎直;順利

文:陳艷
TOP